। बंगलादेशमा राष्ट्रपति मोहम्मद शहाबुद्दिनको राजीनामा माग गर्दै प्रदर्शन सुरु भएको छ ।
विद्यार्थी आन्दोलनका बीच देश छाडेर हिँडेकी पूर्वप्रधानमन्त्री शेख हसिनाको राजीनामा सम्बन्धी ‘कागजी प्रमाण नरहेको’ भन्ने अभिव्यक्ति दिएपछि उनीविरुद्ध प्रदर्शन सुरु भएको हो ।
ढाकाको दैनिक पत्रिका डेली स्टारका अनुसार, बंगलादेशको मानव जमिन पत्रिकाका लागि अन्तर्वार्ता दिने क्रममा उनले हसिनाबारे यस्तो अभिव्यक्ति दिएका थिए ।
‘अगस्ट ५ को बिहान साढे १० बजे बागभवन (राष्ट्रपति निवास) मा प्रधानमन्त्री निवासबाट फोन आएको थियो, लगत्तै तयारी थालेका थियौं’, उनले भनेका छन्, ‘तर, एक घण्टाभित्र हसिना नआउने भन्दै अर्को फोन आएको थियो ।’
त्यहीबीच आफूले हसिनाले देश छाडेको भन्ने सुनेको उनले बताएका छन् ।
‘उनले मलाई केही भनिनन्, मैले तपाईंलाई जे भएको थियो, त्यही सत्य कुरा भनेको हुँ’, उनले मानव जमिनका प्रधान सम्पादक मातुर रहमान चौधरीसँग भनेका छन्, ‘जतिबेला सेना प्रमुख जनरल वाकर बाघभवनमा आएका थिए, त्यसबेला मैले प्रधानमन्त्रीको राजीनामाबारे बुझ्न खोजेँ, त्यसबेला पनि उनले यस्तै जवाफ दिएका थिए– मैले सुनेँ कि उनले राजीनामा दिइन् ।’
राष्ट्रपति शहाबुद्दिनले ‘सम्भवतः आफूहरुलाई जानकारी दिन उनले (हसिनाले) समय नपाएको हुनसक्ने भनेका छन् । यसपछि सुरु भएको प्रदर्शनका क्रममा प्रदर्शनकारी र प्रहरीबीच झडप समेत भएका छन् ।
ढाकाका अखबारहरुका अनुसार, मोहम्मद युनुस नेतृत्वको अन्तरिम सरकारले राष्ट्रपति निवास वरिपरि कडा सुरक्षा व्यवस्था लागू गरेको छ ।
मंगलबारदेखि राष्ट्रपति निवास वरिपरि ब्यारिकेडहरु राखिएका छन् भने पानीको फोहोरासहित झडप नियन्त्रणमा लिन एपीसीहरु पनि निकालिएका छन् ।
प्रदर्शन जारी रहेकै बेला अन्तरिम सरकारको सूचना सल्लाहकार नसिद इस्लामले सरकारले राष्ट्रपतिबारे सबै सरोकारवालासँग छलफल गरिरहेको र कुनै निर्णय आउने बताएका छन् । ‘राष्ट्रपति आफ्नो कार्यालयमा रहन्छन् कि रहँदैनन् भन्ने कानुनी वा संवैधानिक प्रश्न होइन, यो राजनीतिक निर्णय हो’, उनले भनेका छन् ।
‘यो निर्णय लिनका लागि पनि हामी देशमा स्थायित्व, सुरक्षा र अनुशासनलाई प्राथमिकता दिइरहेका छौं’, उनले भनेका छन् ।
तीन महिना लामो आरक्षणविरुद्धको आन्दोलनपछि बंगलादेशकी प्रधानमन्त्री शेख हसिना २१ साउन २०८१ मा देश छाडेर भारततर्फ जान बाध्य भएकी थिइन् ।
यसपछि सेनाको अग्रसरतामा विद्यार्थीको माग अनुसार नोबेल पुरस्कार विजेता मोहम्मद युनुसको नेतृत्वमा आन्तरिम सरकार बनेको थियो ।
विद्यार्थी आन्दोलनले हिंसात्मक रुप लिँदा कम्तीमा ४०० जनाको मृत्यु भएको थियो । यो मामिलामा अहिले बंगलादेश छाडेकी पूर्वप्रधानमन्त्री हसिनासहित उनको पार्टी आम अवामी लिगका नेताहरुविरुद्ध विभिन्न अदालतमा मुद्दा चलिरहेको छ ।
