— इजरायलले हेजबुल्लाह समूहलाई सहयोग उपलब्ध गराएको दाबी गर्दै दक्षिणी लेबनान र बेरुतका बैंकमा आक्रमण गरेको छ । इजरायली रक्षा बल (आईडीएफ)ले दक्षिणी लेबननस्थित हेजबुल्लाहको नियन्त्रणमा रहेका दाहिय र बेका उपत्यका क्षेत्रमा भीषण हवाई आक्रमण गरेको बीबीसीले जनाएको छ । आक्रमणमा मानिसहरू हताहत भएको विषयमा भने केही उल्लेख गरिएको छैन ।
लेबनानको सरकारी समाचार संस्था एनएनएले बेका उपत्यकालगायतका स्थानमा अल–कार्द अल–हसन बैंकका केही शाखामा आईडीएफले आक्रमण गरेको जनाएको छ । त्यस्तै, बेरुतस्थित रफिक हरारी अन्तर्राष्ट्रिय विमानस्थल परिसरमा रहेको बैंकका पनि आक्रमण भएको जनाइएको छ ।
आक्रमणपछि विमानस्थलनजिकै धूवाँ उडेको तस्बिरहरु सार्वजनिक भएका थिए । लेबनानमा उक्त बैंकका ३० भन्दा धेरै शाखा रहेका बीबीसीले जनाएको छ । तीमध्ये १५ वटा बेरुतमा छन् । बैंकले हेजबुल्लाहलाई आर्थिक सहयोग गर्ने गरेको इजरायल र अमेरिकाको दाबी छ ।
यसअघि आईडीएफले बेरुतका १४ र लेबनानका २० क्षेत्रमा आक्रमण गर्ने चेतावनी दिएको थियो । आईडीएफले आफ्नो आक्रमण हेज्बुल्लाहलाई सहयोग पुर्याइरहेका बैंक तथा अन्य वित्तीय पूर्वाधारहरूमा आक्रमण गरिने जनाएको थियो ।
आईडीएफका प्रवक्ता ड्यानियल हगारीले आइतबार साँझ एउटा विज्ञप्ति जारी गर्दै हेज्बुल्लाहलाई आर्थिक सहयोग गरिरहेका क्षेत्रमा रहेका स्थानीयलाई तत्कालै अन्यत्र जान चेतावनी दिएका थिए । ‘हामी केही घण्टामै कैयौं स्थानमा आक्रमण गर्दै छौं,’ उनले भनेका थिए । इरानले गैरसैनिक संघसंस्थाका माध्यमबाट हेजबुल्लाहलाई आर्थिक सहयोग उपलब्ध गराएको सूचना प्राप्त भएको हगारीको दाबी छ ।
यसैबीच, आईडीएफले लेबनानमा शान्ति कायम गर्न खटिएको संयुक्त राष्ट्रसंघीय मिसन (युनिफिल) कार्यालयमा पनि आक्रमण गरेको छ । आईडीएफले नियोजित रूपमा आफ्नो निगरानी टावर र कार्यालयको पर्खाल ध्वस्त पारेको युनिफिलले जनाएको छ । आक्रमणमा आफ्ना तीन सैनिकको ज्यान गएको लेबनानको सेनाले जनाएको छ ।
