: साबिक विजेता बंगलादेश दक्षिण एसियाली फुटबल महासंघ (साफ) महिला च्याम्पियनसिपको पहिलो खेलमै हारबाट जोगिएको छ । त्रिपुरेश्वरस्थित दशरथ रंगशालामा आइतबार भएको समूह ‘ए’ को खेलमा बंगलादेश पाकिस्तानसँग १–१ गोलको बराबरीमा रोकिएको हो । एक गोलले पछि परेको बंगलादेशले इन्जुरी समयमा गोल गर्दै बराबरी गरेको थियो ।
निकै प्रतिस्पर्धात्मक खेलको ३२औं मिनेटमा जहमेना मलिकले गोल गर्दै पाकिस्तानलाई अग्रता दिलाएकी थिइन् । दुई विपक्षी रक्षकलाई बिट गर्दै जहमेनाले उत्कृष्ट गोल गरेकी थिइन् । इन्जुरी समयमा सम्सुनुहार जुनियरले गोल गर्दै बंगलादेशलाई हारबाट जोगाएकी थिइन् । यसअघि सर्वाधिक सफल टोली भारतसँगको पहिलो खेलमा पाकिस्तान ५–२ गोलले पराजित भएको थियो । समूह ‘ए’मा भारतले एक खेलमा तीन अंक जोडेको छ । बंगलादेश र पाकिस्तानको भने एक÷एक अंक छ । बंगलादेश र पाकिस्तानबीच बुधबार हुने खेलपछि समूहको विजेता र उपविजेताको टुंगो लाग्नेछ ।
प्रतियोगिताअन्तर्गत सोमबार दुई खेल हुनेछ । पहिलो खेलमा भुटान र श्रीलंका आमनेसामने हुँदा अर्को खेलमा घरेलु टोली नेपालले माल्दिभ्सको सामना गर्नेछ । प्रतियोगितामा नेपालसहित माल्दिभ्स, पाकिस्तान, श्रीलंका, भारत, भुटान र बंगलादेश गरी सात टोलीले प्रतिस्पर्धा गर्ने छन् । च्याम्पियनसिपमा सहभागी सात टोलीलाई दुई समूहमा विभाजन गरिएको छ । साविक विजेता बंगलादेश, भारत र पाकिस्तान समूह ‘ए’ मा छन् । यस्तै समूह ‘बी’मा नेपाल, भुटान, श्रीलंका र माल्दिभ्स छन् ।
साफ च्याम्पियनसिप नेपालले आयोजना गर्न लागेको तेस्रो पटक हो । यसअघि सन् २०१९ र २०२२ मा पनि नेपालले नै आयोजना गरेको थियो । सन् २०२२ को संस्करणमा नेपाल फाइनलमा बंगलादेशसँग ३–१ गोलले पराजित भएको थियो । साफ च्याम्पियनसिपको सबैभन्दा सफल राष्ट्र भारत हो । भारतले अहिलेसम्म पाँच पटक उपाधि जितिसकेको छ । यस्तै बंगलादेशले एक पटक उपाधि चुमेको छ ।
६ संस्करणमध्ये पाँच संस्करणमा फाइनलमा पुगेको नेपाल उपविजेतामै सीमित बन्दै आएको छ । चार पटक भारतसँग पराजय बेहोरेको नेपाल अघिल्लो संस्करणमा बंगलादेशसँग घरेलु मैदानमै स्तब्ध बनेको थियो ।
