सूचना प्रविधि तथा इन्टरनेट क्षेत्रको दिग्गज कम्पनी गुगलले गत सोमबार विश्वकै पहिलो यस्तो कर्पोरेट सम्झौता गरेको छ, जसको उद्देश्य धेरैवटा साना मोडुलर रिएक्टर (small modular reactor) अर्थात एसएमआरबाट विद्युत ऊर्जा खरिद गर्नु रहेको छ ।

कम्पनीले यसको मद्दतले आर्टिफिसियल इन्टेलिजेन्सको ऊर्जा मागलाई पूरा गर्नेछ ।


गुगलले Kairos Power कम्पनीसँग उक्त सम्झौता गरेको हो । काइरोसले सन् २०३० सम्ममा आफ्नो पहिलो एसएमआर बजारमा ल्याउनेछ । त्यसपछि सन् २०३५ सम्ममा अघिल्लो मोड्युलरलाई जोडिनेछ ।

गुगल र काइरोस पावरबीच भएको पछिल्लो सम्झौताका विस्तृत वित्तीय विवरणहरू हालसम्म सार्वजनिक भने गरिएको छैन । तथापि उक्त सम्झौता अनुसार यी रिएक्टर प्लान्टहरु अमेरिकामा तयार गरिनेछ, जसबाट एआई प्रणालीका लागि आवश्यक उर्जाको आपूर्ति गरिनेछ ।




५०० मेगावाटको ऊर्जा माग

गुगलका अनुसार उसले कूल ५०० मेगावाट बिजुलीका लागि काइरोससँग उक्त सम्झौता गरेको हो । ७ वटा एसएमआरबाट उक्त ऊर्जा प्राप्त हुनेछ । एसएमआर अहिले उपलब्ध आणविक रिएक्टरको तुलनामा निकै सानो आकारका हुनेछन् ।

स्मरण रहोस् विभिन्न प्रविधि कम्पनीहरुले पछिल्लो समयमा आणविक ऊर्जा उत्पादक कम्पनीहरुसँग साझेदारी गरिरहेका छन् ।

एआई सिस्टमका लागि आकस्मिक रुपमा निकै धेरै ऊर्जाको माग हुन थालेको छ । जसलाई पूरा गर्नका लागि ठूलो परिमाणको तथा दीगो ऊर्जा उत्पादकसँग प्रविधि कम्पनीहरुले सहकार्य थालेका छन् ।

गत मार्च महिनामा अमेजनले टालेन इनर्जी कम्पनीबाट न्युक्लियर पावर डेटा सेन्टर खरीद गरेको थियो । त्यस्तै गत महिना माइक्रोसफ्ट र कन्स्टेलेसन इनर्जीबीच ऊर्जा सम्झौता भएको थियो, जसअन्तर्गत माइक्रोसफ्टले कन्स्टेलेसन इनर्जीबाट आणविक ऊर्जा प्राप्त गर्नेछ ।

आफ्नै एआई तयार गर्दै प्रविधि कम्पनीहरू

गुगल, माइक्रोसफ्ट तथा एप्पल लगायतका विभिन्न कम्पनीहरुले एआई प्रविधिमा काम गरिरहेका छन् ।

भविष्यको मागलाई दृष्टिगत गर्दै अधिकांश कम्पनीहरुले एउटा एआई सिस्टम तयार गर्न चाहन्छन्, जो अन्य कम्पनीहरुभन्दा अधिक समृद्ध तथा सटिक होस् ।

मोड्युलर रिएक्टर के हो ?

लघु मोड्युलर रिएक्टर अर्थात् एसएमआर एक प्रकारको परमाणु रिएक्टर हो जुन पारम्परिक परमाणु ऊर्जा संयन्त्रको तुलनामा सानो आकारको हुन्छ भने निकै अत्याधुनिक तथा समृद्ध प्रविधिले युक्त बनाइन्छ ।

एउटा एसएमआरको बिजुली उत्पादन क्षमता ३ सय मेगावाट सम्म हुन्छ । यसलाई कारखाना आदिमा निर्माण गर्न सकिन्छ र कुनै अर्को ठाउँमा पनि सार्न सकिन्छ ।