। एन्फा महिला लिगमा त्रिभुवन आर्मीकी अमिशा कार्की र चन्द्रा भण्डारीको ह्याट्रिकमा आर्मीले चन्द्रपुर नगरपालिकामाथि १०–० को फराकिलो जित हात पारेको छ ।
सातदोबाटोस्थित एन्फा कम्प्लेक्समा भएको खेलमा, खेलको सुरुवाती मिनेटमा नै चन्द्रा भण्डारीले गोल गर्दै आर्मीलाई अग्रता दिलाएकी हुन् ।
खेलको २७ औं मिनेटमा अमिशा कार्कीले गोल गरिन् । ३२ औं मिनेटमा हिमा चौधरीको गोल रह्यो । ४० औं मिनेटमा अमिशाको पासमा चन्द्रा भण्डारीले व्याक्तिगत दोस्रो गोल गरिन् । खेलको ४२ औं मिनेटमा अमिशाले पनि आफ्नो व्याक्तिगत दोस्रो र आर्मीको लागि पाँचौं गोल गरिन् ।
पहिलो हाफमा ५–० को अग्रता बनाएको आर्मीले दोस्रो हाफमा पुन ५ गोल थप्यो ।
खेलको ५१ औं मिनेटमा चन्द्रपुरकी गोलकिपरले बल रोक्दा पेनाल्टी बक्स भित्र भएको फाउलमा आर्मीले पेनाल्टी पायो । पेनाल्टीमा दिपा शाहीले सहज गोल गरिन् । त्यस्तै खेलको ६७ औं मिनेटमा पेनाल्टी बक्स भित्र चन्द्रपुरकी सलोनी राना मगरको ह्यान्डबल रहँदा पुन आर्मीले पेनाल्टी पायो । पेनाल्टीका लागि आर्मीकी गोलकिपर अन्जना राना मगरले पेनाल्टीमा गोल गरिन् ।
पुन अमिशा कार्कीले एक मिनेट पश्चात अर्थात खेलको ६८ औं मिनेटमा गोल गर्दै आफ्नो ह्याट्रिक पूरा गरिन् ।
त्यसपश्चातको १५ मिनेट भने चन्द्रपुरले आर्मीलाई रोकिरह्यो । खेलको ८४ औं मिनेटमा गोल गर्दै चन्द्रा भण्डारीले पनि आफ्नो ह्याट्रिक पूरा गरिन् । यो आर्मीको लागि भने नवौं गोल थियो ।
त्यसको १ मिनेट पश्चात सर्मिला थापा मगरले गोल गर्दै आर्मीको १० गोल पूरा गरिन् । चन्द्रपुरको भने सबैभन्दा बलियो मानिएको डिफेन्सिफ क्षेत्र नै आज कमजोर देखियो ।
आर्मीको आजको फराकिलो १६ अंक सहित दोस्रो स्थानमा नै रहनेछ । आर्मीले ७ खेल खेलिसक्दा ५ जित, १ हार र १ बराबरी खेलेको छ ।
त्यस्तै, चन्द्रपुरको भने यो दोस्रो हार हो । ७ खेल खेलिसक्दा ४ बराबरी खेलेको चन्द्रपुरले १ मात्र जित हात पारेको छ । चन्द्रपुर हाल ७ अंक सहित अंक तालिकाको छैटौं स्थानमा रहेको छ ।
आजको पहिलो खेलमा एपिएफ क्लबले कोशी प्रदेशलाई ८–० ले हराएको थियो ।
