: साउदी अरेबियामा एनआरएन साउदीले तीज विशेष कार्यक्रम सम्पन्न गरेको छ। ६ सेप्टेम्बर २०२४ का दिन भएको कार्यक्रममा पानसमा बत्ती बाली राष्ट्रिय गानबाट सुचारु गरिएको थियो भने आयोजकले कार्यक्रममा उपस्थिति सबैलाई स्वागत मन्तव्यसहित हरितालिका तीजको शुभकामना दिएको थियो।
कार्यक्रममा अध्यक्ष रबिना अर्यालले नेपाली महिलाहरूको पर्व तीजलाई साउदीमा नेपालकै अनुभूति हुने गरि भव्य बनाउनका लागि उपस्थित सबैलाई धन्यवाद दिएकी थिइन् भने संस्थाका पूर्व अग्रजहरूको उपस्थितले थप हौसला मिलेको र आगामी दिनमा संस्थालाई सबैसँग सहकार्य गरि थप बलियो बनाउँदै लैजाने भन्दै तीजको शुभकामना व्यक्त गरिन।
कार्यक्रममा रियाद दूतावास ,तथा साउदीमा रहेका विभिन्न संस्थाका प्रतिनिधि तथा नेपाली दिदी बहिनी लगायत अन्यको बाक्लो उपस्थिति रहेको थियो भने रियाद दूतावासका श्रम सहचारी देवेन्द्र कार्की लगायत संस्थाका प्रतिनिधिले तीजको शुभकामना तथा कार्यक्रम ऐतिहासिक भएको भन्दै बधाई दिएका थिए।
कार्यक्रममा गायिका प्रीती आले ले तीजको लरि लै , सोल्टी राजाको तुम्लेट, नयाँ साथी ,नानीको कहाँ पर्यो घर, फुल्लो बाबरी, दुनियालाई,खरि झर्यो ,जस्ता गीतबाट दर्शकहरू लाई मनोरन्जन दिइएकी थिइन। तीजको रहर आयो बरि लै गीतमा सामूहिक रूपमा नृत्य गर्नुको साथै आइन आमा यो तीजमा, तीजको रहर आयो बरि लै, रमाइलो गरौं सँगी हो तीजको लहर, चिटिक्कै भाकी छौ रे, खाउँकी की नखाउँ दर कोसेली, कोही छैन सँग सँगै घुम्न, हङकङको साडीले हरिया हरिया जस्ता रिमिक्स तीजका विभिन्न गीतहरूमा उपस्थित दिदी बहिनीहरूले कम्मर मर्काएर नाच्दै रमाइलो गरेका थिए।
स्थानीय कलाकारहरूको बेजोड प्रस्तुति रहेको थियो भने कार्यक्रममा गायिका आलेलाई एनआरएन तथा विभिन्न संस्थाले स्वागत तथा सम्मान समेत गरेका थिए। कार्यक्रम तीजको उपलक्ष्यमा दर स्वरूप विभिन्न किसिमका परिकारहरूको व्यवस्था गराइएको थियो। कार्यक्रममा प्रवेश शुल्क समेत निःशुल्क रहेको थियो भने गायिका प्रीती आलेको सम्पूर्ण खर्च अध्यक्ष रबिना अर्यालको व्यक्तिगत रूपमा गरिएको थियो।
