: मुस्ताङको घरपझोङ गाउँपालिकामा शनिबारदेखि वडास्तरीय ‘प्रथम अध्यक्ष कप’ सुरु भएको छ। घरपझोङ गाउँपालिकाको आर्थिक वर्ष २०८१/०८२ को वार्षिक स्वीकृत कार्यक्रम अनुरूप मुस्ताङको घरपझोङ-५ ठिनीमा यसैवर्षदेखि ‘अध्यक्ष कप’ खेलकुद प्रतियोगिता सुरुवात गरिएको हो।
प्रतियोगिता अन्तर्गत भलिबल खेल र स्थानीय सादा धनुषवाण(तारा) खेल प्रतियोगिता समावेश गरिएको जनमुक्ति युवा क्लबका अध्यक्ष सञ्जय थकालीले जानकारी दिए।
बर्सेनि आलोपालो सञ्चालन हुने गरी सुरु गरिएको प्रथम अध्यक्ष कपको पहिलो आयोजना गर्ने मौका घरपझोङ वडा नम्बर ५ ले पाएको हो । भलिबलतर्फ ५ वटै वडाबाट अनिवार्य एक/एक टिम सहभागी हुने व्यवस्था गरिएको छ।
भलिबल खेलको च्याम्पियनले नगद ५० हजार र उपविजेताले नगद ३० हजारसहित शिल्ड , मेडल र प्रमाणपत्र प्राप्त गर्ने छन्। ५० भन्दा माथि र ५० भन्दा तल्लो उमेरका खेलाडी सहभागी टिमले क्रमशः नगद २५ हजार र १५ हजारसहित शिल्ड, मेडल, ट्रफी र प्रमाणपत्र पाउने छन्।
