। अमेरिकाको भर्जिनियाबाट ममता काफ्ले बेपत्ता हुनु महिनाअघि उनका श्रीमान् नरेश भट्टले गुगलमा ‘श्रीमतीको मृत्युको कति समयपछि विहे गर्न सकिन्छ’ भनेर खोजेको अनुसन्धान अधिकृतहरुले बताएका छन् ।
प्रहरी नियन्त्रणमा रहेका नरेशलाई अदालतमा उपस्थित गराएका बेला सरकारी पक्षका वकिलहरुले उनले कम्प्युटरबाट त्यसबारे गुगलमा खोजी गरेको जिकिर गरेका हुन् ।
अमेरिकाको द वासिङ्टन पोस्टले लेखेअनुसार, वकिलहरुले ममताका साथीहरुले उनलाई घरमा श्रीमानबाट हिंसा हुने गरेको बयान दिएको पनि बताएका छन् । मनसास पार्क प्रहरीले भट्टको घरमा छापा पार्दा ममता मारिएको हुनसक्ने संकेतहरु फेला परेको वकिलहरुले भनेका छन् ।
छापा मारेको भोलिपल्ट ७ भदौमा मनसास पार्क प्रहरीले नरेशलाई घरबाटै पक्राउ गरेको थियो । उनलाई नियन्त्रणमा लिँदा प्रहरी अधिकृतहरुले घरको कार्पेट पनि निकालेर फरेन्सिक भ्यानमा हालेका थिए ।
प्रहरीले अन्तिममा घरमा रगतको ट्रेस खोज्नलाई ब्लूस्टार प्रविधि प्रयोग गरेको थियो । यसबाट आगाले देख्न नसकिने रगतको टाटाहरु पनि देख्न सकिन्छ ।
ममता काफ्ले गएको १५ साउनमा मनसास पार्कबाट बेपत्ता भएकी थिइन् । त्यसपछि अमेरिकाको नेपाली समुदाय र स्थानीय प्रहरीले उनको खोजीलाई तीव्र बनाएको थियो ।
‘बेडरुम र बाथरुमको रगतको मात्राले जीवित नरहने खालको चोटको संकेत गर्छ’, अभियोजनकर्ता तर्फकी वकिल सारा सामीले अदालतमा भनेकी छन्, ‘यो घटनाको हरेक संकेत के हो भने ममता जीवित छैनन् र शरीर नभए पनि अदालतले हत्याको अभियोग लगाउन सक्छ ।’
सोमबार उनलाई थुनामै राखेर अनुसन्धान अघि बढाउने कि बाहिर राखेर भन्ने विषयमा अदालतमा बहस भएको थियो । त्यसमा अधिकांश समय भट्ट पक्षका वकिलले शरीर नभेटिई यस्तो अभियोग लगाइएको भन्दै छाड्नुपर्ने जिकिर गरेका थिए ।
भट्ट पक्षका वकिलले ममताको पक्षमा नागरिकस्तरबाट दबाब बढिरहेका बेला हतारमा पर्याप्त प्रमाणबिनै मुद्दा लगिएको जिकिर गरेका थिए ।
‘यो मुद्दामा मृत शरीर भेटिनु अत्यन्त जरुरी हुन्छ’, भट्ट पक्षका वकिल सालेभ बेन अब्राहमले भने । उनले मिडियाको दबाबका कारण पनि नरेशलाई पक्राउ गरिएको दाबी गरे । ‘मनसास पार्क प्रहरी केही न केही गर्नलाई एकदमै दबाबमा थियो’, उनले अदालतसमक्ष दाबी गरे ।
लगत्तै सरकारी वकिल समीले भट्टको विपक्षमा भएका प्रमाणहरु अघि सारिन् । उनले नरेशले इन्टरनेटमा सर्च गरेको विषयहरुदेखि लिएर रगतको विवरण पनि प्रस्तुत गरिन् ।
अभियोजनकर्ता पक्षले भट्टमाथि अनुसन्धान अधिकारीहरुले शंका नै नगरेका बेला देश छाडेर जान लागेको जिकिर पनि गरेका थिए । उनले आफ्नो टेस्ला कार पनि पहिल्यै बिक्री गरिसकेका थिए भने घर पनि बिक्री गर्ने तयारीमा थिए ।
बाथरुमको भित्ता, सावर र भुइँमा उल्लेखनीय मात्रामा रगतको ट्रेस भेटिएको भनिएको छ । घटनास्थलमा गएकी एक अनुसन्धानकर्ताले आफूले त्यति धेरै रगत कहिल्यै नदेखेको बताएको पनि वकिल समीले भनेकी छन् ।
भट्टको घरमा भेटिएको रगतको परीक्षण प्रतिवेदन आउन बाँकी छ । तर, समीले अदालतमा प्रारम्भिक जाँचमा त्यो रगत मानिसकै भएको देखिएको बताएकी छन् ।
समीले ममता र नरेशबीचको सम्बन्ध नराम्रो भएको विषयमा थप विवरणहरु पनि प्रस्तुत गरिन् । गएको फेब्रुअरीमा पनि ममताले प्रहरीलाई घरमा बोलाएकी थिइन् । त्यसबेला अधिकारीहरुले उनीसँग कुरा गर्दा श्रीमानले आफ्ना कागजातहरु नदिएको र फोन पनि भाँचिदिएको बताएकी थिइन् ।
प्रहरीले अन्तिममा घरमा रगतको ट्रेस खोज्नलाई ब्लूस्टार प्रविधि प्रयोग गरेको थियो । यसबाट आगाले देख्न नसकिने रगतको टाटाहरु पनि देख्न सकिन्छ । त्यसक्रममा रगतका छिटाहरु बेडरुममा देखिएको अभियोजनकर्ता वकिल समीले भनेकी छन् ।
‘सबै विवरण हेर्दा अनुसन्धान अधिकृतहरुले केही बेडरुमदेखि बाथरुमसम्म केही घिसारिएको जस्तो देखिएको निष्कर्ष निकालेका छन्’, उनले अदालतमा भनेकी छन् ।
बाथरुमको भित्ता, सावर र भुइँमा उल्लेखनीय मात्रामा रगतको ट्रेस भेटिएको भनिएको छ । घटनास्थलमा गएकी एक अनुसन्धानकर्ताले आफूले त्यति धेरै रगत कहिल्यै नदेखेको बताएको पनि समीले भनेकी छन् ।
प्रहरीले घरमा छापा मार्दा बेडरुममा कार्पेट सफा गर्ने केमिकलको दुईवटा बट्टा फेला पारेको समेत उनले भनेकी छन् । बहसपछि अन्तिममा अदालतका लागि नरेश खतरा हुनसक्ने भन्दै न्यायाधीशले थुनामा राख्न आदेश दिए ।
यो मामिलामा अर्को सुनुवाइ दुई महिनापछि अक्टुबरमा हुने वासिङ्टन पोस्टले लेखेको छ ।
