। भुटानको पारो एफसीले मंगलबार नेपालको लिग च्याम्पियन चर्च ब्वाइज युनाइटेडलाई दशरथ रंगशालमा २-१ ले पराजित गर्दै एएफसी च्यालेन्ज लिगको समूह चरणमा स्थान बनायो ।
वर्षाको कारण हिलाम्मे बनेको मैदानमा तीनपटक विश्वकप खेलिसकेका जापनी स्टार केसुके होन्डाको कप्तानीमा मैदान उत्रेको पारोले एक गोलले पछि परेको स्थिति उल्टाउँदै चर्च ब्वाइजलाई हराएको हो ।
चर्च ब्वाइजका लागि लकेन लिम्बुले गोल गर्दै अग्रता दिलाए पनि पारोका किंगा वाङ्चुकले बराबरी गोल फर्काए । यस्तै नेपालमा ए डिभिजन र एनएसएल खेलिसकेका विलियम ओपोकुले पारोका लागि दोस्रो हाफमा विजयी गोल गरे ।
यो खेलमा मुख्य गरी दुई विषयले धेरै चर्चा पायो । पहिलो मैदानको अवस्था । दोस्रो केसुके होन्डाको उपस्थिति ।
हिलाम्मे मैदानमा पारोले मारेको बाजी
खेलअघि दुई घण्टाको निरन्तर वर्षाले गर्दा मैदान धेरै भिजेको थियो । खेलको समयमा पनि पानी परे खेल्न झन् कठिन हुने सम्भावना थियो । तर, खेल सुरु हुनु एक घण्टाअघि नै वर्षा रोकिंदा खेल हेर्न जाने दर्शकलाई पनि राहत भयो । करिब ९ हजारभन्दा बढी दर्शक चर्च ब्वाइज र पारोबीचको खेल हेर्न उपस्थित भएका थिए ।
झण्डै ९ महिनापछि दशरथ रंगशालमा अन्तर्राष्ट्रियस्तरको फुटबल फर्किंदा दर्शकहरू नेपाली टोलीको जित हेर्न चाहन्थे । तर, मैदानमा त्यस्तो भएन । भुटानी लिग च्याम्पियन पारो नेपाली लिग च्याम्पियन चर्च ब्वाइजभन्दा अब्बल देखियो ।
‘लक्ष्य जितेर क्वालिफाई हुने थियो । तर दुर्भाग्यवश ५०-५० को गेमा पाएको अवसर सदुपयोग गर्न सकेनौँ । कमीकमजोरी भयो ।’ चर्च ब्वाइजका मुख्य प्रशिक्षक बालगोपाल महर्जनले हारपछि पोष्ट म्याच कन्फ्रेन्समा भने ।
पहिलो हाफमा पारोको दुई प्रहार पोष्टमा लागेर फर्कंदा अग्रता लिने अवसर गुमाएको थियो । ३८औं मिनेटमा लकेनले गोल गर्दै चर्च ब्वाइजलाई अग्रता दिलाएका थिए । तर, दुई मिनेटपछि नै किंगाले पारोका लागि बराबरी गोल गरे ।
दोस्रो हाफमा सुरुदेखि नै दुवै टोलीले गोल थप्न आक्रमक बनेका थिए । तर, ६६औं मिनेटमा ओपोकुलुले गोल गर्दै पारोलाई अग्रता दिलाए र त्यही अग्रता कायम राख्दै जित हात पार्यो ।
चर्च ब्वाइजका प्रशिक्षक बालगोपाल महर्जनले डिफेण्डिङ थर्डमा कमजोर प्रदर्शन भएको बताए । यस्तै, महर्जनले मैदानको अवस्थाको कारण पनि गाह्रो भएको बताए । ‘मैदानको कन्डिसनले पनि गाह्रो भयो । नतिजा नआएकोमा दु:खी छु’, उनले भने, ‘मैदानको बारे सबैलाई थाहा छ । नेपालको खेल क्षेत्र र फुटबलम एउटै मैदान छ । ३५-४० वर्ष भइसक्यो । अब यसमा ध्यान जानु जरुरी छ । विगतमा हामीले खेल्दा नि यस्तै थियो अहिले पनि यस्तै अवस्था छ । हामीसँग वैकल्पिक अर्को मैदान छैन । मैदान राम्रो भएको भए अझ राम्रो हुन्थ्यो कि ?’
दशरथ रंगशालाको अवस्था भने निकै दयनीय थियो । यस मैदानलाई धेरैले धान रोप्ने खेतसँग तुलना गर्दै सामाजिक सञ्जालमा समेत पोष्ट गरे ।
अघिल्लो दिन दशरथ रंगशालको बारेमा कमेन्ट गरेका पारोका प्रशिक्षक पुष्पलाल शर्माले भने खेल जितेपछि यसबारे धेरै प्रतिक्रिया दिएनन् । उनले दुवै टोलीलाई खेल्न कठिन भएको बताए । ‘यसले दुवै टोलीलाई खेल्न कठिन भयो,’ उनले सटिक जवाफ दिए ।
यस्तै प्लेअर अफ दि म्याच बनेका विलयमले पनि मैदानको अवस्थाका कारण कठिन भएको बताउँछन् । ‘हामीले योजना अनुसार खेल्यो । म अवसर हेरिरहेको थिएँ स्कोरका लागिर अवसरमा गोल गरें । धेरै खुशी छु । मैदानको अवस्थामा राम्रो थिएन,’ उनले थपे ।
होन्डा र विदेशी खेलाडीको प्रभाव
मैदानको अवस्थापछि अर्को चर्चित विषय होन्डा नै बने । विश्वकप खेलेका खेलाडीको जादु हेर्न रंगशालमा दर्शकहरु उत्साहित थिए । तर, मैदानको अवस्थाका कारण उनले अपेक्षा अनुसारको खेल देखाउन सकेनन् ।
तर पनि आर्मब्यान्ड लगाएर पारोको नेतृत्व गरेका उनले टिमलाई निराश बनाएनन् । होन्डाको नेतृत्वमा पारोले पहिलोपटक नेपाली भूमिमा जित हात पार्यो ।
एएफसीले च्यालेन्ज लिगमा लागि विदेशी खेलाडीको संख्या असीमित राख्दा त्यसको फाइदा पारोले उठायो । उसले होन्डासहित ११ विदेशी टिममा राखेको थियो भने पहिलो रोजाइमा ९ खेलाडी खेलाएको थियो । जसमा भुटानसहित ५ देशका खेलाडी थिए । जापानका ४, घानाका २, सर्वियाको २ र मोन्टेनेग्रोको २ खेलाडी पहिलो रोजाइमा खेलेका थिए ।
पारोका लागि पहिलो गोल भुटानी खेलाडी किङ्गा वाङचुकले गरे पनि विजयी गोल विलियम ओपोकुले गरेका थिए ।
चर्च ब्वाइजका प्रशिक्षक बालगोपाल महर्जनले पारोमा विदेशी खेलाडी धेरै हुँदा फाइदा पुगेको बताए । ‘विपक्षीको विदेशी हाम्रो ३ जनाभन्दा राम्रो र क्वालिटी खेलाडी देखियो र त्यो पनि फरक परेको जस्तो लाग्छ,’ महर्जनले भने ।
महर्जनले होन्डाको नामका कारण पनि धेरै दर्शक खेल हेर्न आएको बताए । तर, यो भुटानको टिम भए पनि मैदानमा विदेशी धेरै हुँदा त्यस्तो नदेखिएको बताए । ‘हुन त भुटानको टिम हो । तर फिल्डमा भुटानको टिम जस्तो देखिएन । ९ जना विदेशी सुरुमा खेलेका थिए । भुटान नाम मात्र हो । टिममा विदेशी खेलाडी धेरै थिए । हाम्रोमा पनि २-३ जना विदेशी भइदेको भए राम्रो हुन्थ्यो,’ उनले भने ।
पारोका प्रशिक्षक पुष्पलाल शर्माले पनि यस खेलका लागि भनेर नै विदेशी खेलाडीहरु अनुबन्ध गरेको र सफलता हात पार्दा यसले ठूलो अर्थ राख्ने बताए ।
‘यो हाम्रो लागि ठुलो अवसर हो । हामीले विगतमा धेरै प्रयास गर्यौं भुटानका खेलाडीबाट गेमलाई अघि बढाउन । तर चारपटक पनि सफल नभएपछि खेलाडीको क्षमता बढाउन र खेल अघि बढाउनका लागि बाहिरबाट खेलाडी ल्याएर मिसायौं । यसका लागि हामीले भुटानी खेलाडीलाई असर नपर्ने गरी उनीहरुलाई कन्भिन्स गरेका थियौं,’ प्रशिक्षक शर्माले भने, ‘यो जितले दुई तीन वर्ष हामीलाई क्लब चलाउन समस्या हुँदैन । यो जितले भुटानी फुटबलमा धेरै महत्व राख्छ ।’
च्यालेन्ज लिग प्लेअफ जित्ने टोलीले एएफसीबाट एक लाख डलर प्राप्त गर्नेछ । साथै अब समूह चरणमा अझ धेरै खेल खेल्ने अवसर पाउनेछ ।
