। विश्व बजारमा आक्रामक कमाइ गरिरहेको हलिउड सुपरहिरो फिल्म ‘डेडपुल एण्ड वुल्भरिन’ शुक्रबारदेखि नेपालमा समेत रिलिज हुने भएको छ । विदेशमा रिलिज भएको एक सातापछि फिल्म नेपालमा आउन लागेको हो ।
वितरण कम्पनी एप्पल इन्टरटेनमेन्टले शुक्रबारदेखि यो फिल्म नेपाली हलमा रिलिज हुने पुष्टि गरेको छ । यो फिल्मले पहिलो सप्ताहन्त विश्व बक्सअफिसमा ४३८ मिलियन डलरको उछाल ओपनिङ गरेको छ ।
यो आँकडा धेरै ओपनिङ गर्ने चौंथो सुपरहिरो फिल्म हो । उत्तर अमेरिकामा भने यसले २११ मिलियन डलरको सप्ताहन्त ओपनिङ गरेको छ । उत्तर अमेरिकाको यो ओपनिङ अहिलेसम्म धेरै ओपनिङ हुने इतिहासकै छैटौं हो ।
‘डेडपुल एण्ड वुल्भरिन’को कमाइको मद्दतमा मार्वल सिनेम्याटिक युनिभर्स (एमसीयू) ३० बिलियन डलर कमाउने पहिलो फिल्मको सिक्वेल समेत बनेको छ ।
फिल्मले हड्तालले थलिएको हलिउडलाई ठूलै ऊर्जा समेत दिने मात्र होइन, मार्वल सिनेम्याटिक युनिभर्स (एमसीयू)लाई पुनरुत्थान गर्ने अनुमान छ । न्युयोर्क प्रिमियरमा यसले एमसीयूकै अहिलेसम्मको उत्कृष्ट फिल्मको रुपमा प्रशंसा बटुलेको छ ।
यो फिल्मको नेपाल रिलिजका लागि फ्यान अधैर्य थिए । प्रदर्शन मिति घोषणा भएको खबरले फ्यान उत्साहित छन् ।
अमेरिका, भारतसहित अन्तर्राष्ट्रिय बजारमा भने यो फिल्म गत शुक्रबार नै रिलिज भैसकेको थियो । केही महिनाको अन्तरालपछि नेपाली दर्शकले मार्वल सिनेम्याटिक युनिभर्सको फिल्म हेर्ने मौका पाएका हुन् ।
फिल्ममा ¥यान रेनोल्ड्स, ह्युज ज्याकम्यान, एम्मा कोरिन, मोरेना ब्याकरिन, रोब डेलाने, लेस्ली उग्गाम्स, करण सोनी, म्याथ्यु म्याकफ्याडियनको अभिनय छ ।
