। नेपाली महिला भलिबलका लागि रुसी टोलीसँगको मैत्रीपूर्ण खेल काभा महिला नेसन्स लिगअघि कमजोरी थाहा पाउने राम्रो माध्यम बन्यो ।
नेपालमा १७ साउनदेखि काभा (सेन्ट्रल एसिएन भलिबल एसोसिएसन) महिला नेसन्स लिग खेलअघि नेपाली टोलीले रुससँग दुई मैत्रीपूर्ण खेल खेल्यो ।
रसिया विश्वको शीर्ष १० भित्र पर्ने टिम हो र नेपालमा खेल्न आउने खेलाडीहरु राष्ट्रिय टिम र उमेर समूहको राष्ट्रिय टिमका सदस्यहरु रहेका छन् ।
यो खेलबाट नेपालले आफ्नो कमी कमजोरीलाई नजिकबाट नियाल्ने मौका पायो । पहिलो खेलमा निरिह देखिएको नेपालले दोस्रो खेलमा केही सुधारिएको प्रदर्शन गर्यो ।
आजको खेलमा नेपालले पहिलो सेट २५–१४, दोस्रो २५–२३ र तेस्रो २५–२२ ले गुमायो । तेस्रो सेटमा १० अंकसम्म त नेपालले कहिले बराबरी गर्ने, कहिले अग्रता लिने गरिरहेको थियो ।
पहिलो खेलमा हेरी डिफेन्स र रिसिभमा सुधार भयो । तर आज पनि नेपालको ब्लकलाई भने उचाइले साथ दिएन । नेपालले अग्ला खेलाडीसँग कसरी खेल्ने भन्ने राम्रो ज्ञान पाएको कप्तान अरुणा शाहीले बताइन् । ‘हाम्रो लागि काभा अघि यो खेल निकै राम्रो तयारी भयो । हिजो भन्दा कमजोरी सुधार गर्दै खेल्यौं । काभाको लागि हामीले अग्लो अग्लो खेलाडीसँग कसरी खेल्ने भन्ने सिक्यौं’, उनले भनिन् ।
यो खेललाई काभा नेसन्स लिगको लागि गल्ती सच्याउने मौकाको रुपमा लिएको शाहीले बताइन् । ‘हामीलाई खेल्न पनि रमाइलो भयो ।
काभामा अलिक रिच कम भएको खेलाडीहरु हुन्छन् । हामी अहिले भएको गल्तीहरुलाई काभामा सुधार गर्नेछौं’, उनले भने । काभा नेसन्स लिगमा नेपालसँगै इरान, माल्दिभ्स र श्रीलंका सहभागी हुनेछन् ।
नेपाली महिला भलिबल टिम भर्खरै काभाले गरेको ग्रेडिङमा ए लेभलको टिमको रुपमा वरियता प्राप्त गरेको छ । यसको शाख जोगाउन आउँदै गरेको काभा नेसन्स लिगमा नेपालको प्रदर्शन निकै महत्वपूर्ण हुन्छ ।
‘आजको खेल हेर्दा काभाको दुई हप्ताअघि रुस जस्तो टिमसँग खेलेर अनुभव बटुल्ने मौका पाउनु नै हाम्रो लागि ठूलो हो । त्यसले गर्दा हामीले हार्ने जित्ने भन्दा खेलाडीको दक्षता मापन गर्न सहज पनि भयो’, प्रशिक्षक जगदिश भट्टले भने ।
कप्तान अरुणा शाहीले पनि दोस्रो खेलमा धेरै सुधार भएको बताइन् । ‘हिजो चाहिँ हाम्रो रिसिभ र डिफेन्समा समस्या भइरहेको थियो, आज त्यो पक्ष सुधार भयो तर अझै पनि ब्लकमा समस्या आइरहेको छ । यसलाई हामी १० दिनभित्र सुधार गर्नेछौं’, उनले भनिन् ।
प्रशिक्षक जगदिश भट्टको पनि भनाइ यही रह्यो । ‘रसियाको टिमको हामीले खेल पनि हेरेका थिएनौं र खेलाडीहरुको बारेमा पनि जानकारी थिएन, रसिया भन्नेबित्तिकै हाम्रो खेलाडी नर्भस भएका कारण प्रदर्शन राम्रा भएन’, उनले पहिलो खेलबारे भने, ‘हिजो हामीले खेलेको खेल हेरेर कहाँ कुन फर्मेसनमा खेलाउँदा सहज हुन्छ भनेर खेलाएका हौं ।’
नेपालले दोस्रो खेलमा पनि सोचे अनुरुप खेल्न भने सकेको होइन । प्रशिक्षक भट्टका अनुसार नेपाली खेलाडीले भनेको ठाउँमा ब्लक गर्न सकेनन् । ‘हामीले भनेको जस्तो गर्न सकेको भए हामीले कम्तीमा पनि एउटा सेट चाहिँ हामी जित्न सक्थ्यौं । तर खेल जित्न नसके पनि हामीले प्रतिस्पर्धात्मक खेल खेल्यौं ।’
नेपालमा महिला भलिबलको राम्रो प्रगति भइरहेको प्रशिक्षक भट्ट बताउँछन् । ‘अबको हाम्रो लक्ष्य भनेको दक्षिण एसियामा स्वर्ण जित्ने हो । अबको २ वर्षमा सेन्ट्रल एसियामा उपाधि र ४ वर्षमा एसिया स्तरमा दबदबा बनाउने हो’, उनले भने ।
