। अभिनेता विपिन कार्कीले आफूले भारतीय ब्लकबस्टर फिल्म ‘एनिमल’मा काम नगर्नुको मुख्य कारण ‘प्रसाद २’ भएको खुलासा गरेका छन् । केही साताअघि अमेरिकामा एक भडकास्ट (पडकास्टको भिडियो संस्करण) अन्तर्वार्तामा कार्कीले उक्त कुरा बताएका हुन् ।
उनले भने, ‘मैले एनिमलमा काम नगर्नुको प्रमुख कारण प्रसाद २ हो । प्रसाद २ नभएको भए मैले निश्चय नै एनिमल गर्थें ।’ उक्त भडकास्ट संवादमा कार्की सो फिल्मलाई लिएर आक्रोशित समेत सुनिए ।
आफूले ‘एनिमल’मा काम गर्न सक्ने देखेर ‘प्रसाद २’ का निर्माताले मुद्दा मामिला गर्न चाहेको समेत कार्कीले बताए । ‘उहाँहरुले मुद्दा मामिला गर्न चाहनुभएको थियो । मलाई त्यस्तो मन पर्दैन । मेरो घरमा पनि मलाई कहिल्यै मुद्दा मामिलामा नजा भनेका थिए,’ उनले भने ।
उनलाई सोधियो- तपाईंले कुन फ्रेन्चाइजीमा काम गर्न चाहनुहुन्न ? विपिनको जवाफ थियो, ‘प्रसाद ३ बन्यो भने म काम गर्न चाहन्न ।’ उनको यो जवाफले नै उनी ‘प्रसाद २’ सँग कति क्रुद्ध छन् भन्ने बुझ्न सकिन्छ ।
विपिनले ‘एनिमल’को सन्दर्भमा त्यतिबेला आफूले नेपाली फिल्म ‘फूलबारी’मा काम गरेको र बलिउड फिल्म खेल्नका लागि निर्देशकले प्रेरित गरेको किस्सा पनि सुनाए । ‘यदि तिमी एनिमल गर्छौ भने तिम्रो लागि सुटिङ नै रोक्छु भनेर रामबाबु गुरुङ दाइले भन्नुभयो । मेरो लागि यो खुसीको कुरा थियो,’ उनले भने ।
‘एनिमल’मा विपिनले अडिसन समेत दिएका थिए । उनी तीनपटक काठमाडौं–मुम्बई आउजाउ समेत गरेका थिए । अहिले पनि सन्दीप रेड्डी वांगासँग आफू सम्पर्कमा रहेको र निकट भविष्यमा सहकार्य हुनसक्ने सम्भावना रहेको पनि विपिनले अनलाइनखबरलाई बताइसकेका छन् ।
‘एनिमल’ २०८० सालमा नेपालमा सर्वाधिक कमाउने विदेशी फिल्म बनेको थियो ।
