। ‘ड्युन २’, ‘फ्युरिओसा’, ‘फल गाइ’जस्ता ठूला फिल्मले समेत जोगाउन नसकेको हलिउडको गर्मीयामलाई राहतको खबर छ । धेरैको अनुमान विपरीत विल स्मिथ स्टारर एक्सन फिल्म ‘ब्याड ब्वाइज : राइड अर डाइ’ले सुखद ओपनिङ गरेको छ ।
फिल्मले शुक्रबार २१.६ मिलियन डलर कमायो । शनिबारको कमाइ जोड्दा उत्तर अमेरिकी बक्स अफिसमा ५४ मिलियन डलर पुगेको छ । ३ हजार ८८५ थिएटरबाट फिल्मले पहिलो सप्ताहन्त उक्त कमाइ गरेको डेडलाइन म्यागजिनले उल्लेख गरेको छ ।
विल स्मिथ र माटिन लरेन्स स्टारर यो फिल्म हेर्ने ५८ प्रतिशत दर्शक ३५ वर्षमुनिका छन् भने ४२ प्रतिशत दर्शक अश्वेत रहेको जनाइएको छ ।
यो ओपनिङले हलिउडको गर्मीयामको बक्स अफिसलाई मात्र होइन, पछिल्लो समय संकटग्रस्त अभिनेता विल स्मिथको करिअरलाई पनि ठूलै राहत दिएको छ । ओस्कार समारोहमा क्रिस रकलाई थप्पड हानेको घटनापछि स्मिथ विवादित बन्दै आएका थिए ।
‘ब्याड ब्वाइज : राइड अर डाइ’को व्यापारले हलिउडमा पछिल्लो समय एक्सन–एडभेन्चर फिल्म पुनः लयमा फर्किएको अनुमान पनि गरिएको छ ।
सन् २०२० मा रिलिज भएको यो फिल्मको अघिल्लो श्रृंखला ‘ब्याड ब्वाइज अफ लाइफ’ले उत्तर अमेरिकामा ६२.५ मिलियन डलरको ओपनिङ गरेको थियो । यो फिल्मको कुल कमाइ २०४ मिलियन डलर पुगेको थियो ।
फिल्ममा विल स्मिथ र लरेन्सले प्रहरी जासुसहरु माइक लोरी र मार्कस बर्नेटको भूमिका निर्वाह गरेका छन् । सोनीको यो फिल्मले एसियाली बजारमा भने अपेक्षाभन्दा कम कमाइ गरेको छ ।
यो सप्ताहन्त उत्तर अमेरिकामा रिलिज भएको ‘द वाचर्स’ले २.९ मिलियन डलर कमाइ गरेको छ । यो फिल्म आगामी साता नेपालमा समेत प्रदर्शन तयारीमा छ ।
