। टी–२० विश्वकपमा नेदरल्याण्ड्सविरुद्ध जम्माजम्मी १०४ रनको सामान्य लक्ष्य पच्छ्याएको दक्षिण अफ्रिका क्रिजमा संघर्ष गर्दै थियो ।
५ ओभरमा १२ रन बनाउँदा दक्षिण अफ्रिकाको ४ विकेट पतन भइसकेको थियो । त्यसपछि क्रिजमा आए ट्रिस्टन स्टब्स र डेभिड मिलर । उनीहरुको उत्कृष्ट साझेदारीमा दक्षिण अफ्रिकाले १८.५ ओभरमा ६ विकेट गुमाएर लक्ष्य भेट्टायो ।
खेलको म्यान अफ दि म्याच समेत भएका मिलर दक्षिण अफ्रिकाको जितका नायक बने ।
न्यूयोर्कस्थित आइसेनहोवर पार्कमा भएको १४२. ४ ओभरको खेलमा जम्माजम्मी २३ छक्का प्रहार भएका थिए । अर्थात यो मैदानमा प्रति ३७ बलमा जम्मा १ छक्का प्रहार भएका थिए ।
१८ ओभरमा ६ विकेट गुमाएर ८८ रन बनाउँदा अफ्रिकालाई जितका लागि अन्तिम ६ बलमा १५ रन आवश्यक थियो, जुन सहज थिएन ।
१९ औं ओभरमा बलिङ गर्न बास डी लिडे आइपुगे । मिलरले लिडेलाई पहिलो बलमै छक्का हाने । दोस्रो बलमा उनले २ रन लिँदै मिलरले स्ट्राइक आफैंसँग राखे ।
तेस्रो बल डट भयो । चौथो बलमा मिलरले फेरि चौका हाने । जितका लागि अब अफ्रिकालाई जम्मा ३ रन चाहियो । १९औं ओभरको पाँचौं बलमा मिलरले फेरि छक्का हान्दै अफ्रिकालाई महत्वपूर्ण जित दिलाएका छन् ।
‘यो बाउण्ड्री प्राप्त गर्न निकै गाह्रो थियो, तर जसरी पनि हामीलाई आवश्यक थियो’, खेलपछि मिलर भने, ‘यसको विकल्प नभएपछि जसरी पनि बाउन्ड्री हान्नुपर्छ भने सोचका साथ खेलेको थिएँ । सौभाग्य, त्यो सफल भयो ।’
५१ बलमा ४ छक्का र ३ चौकासहित ५९ रनमा मिलर अविजित रहे । दक्षिण अफ्रिकाले लक्ष्य चेज गरेका खेलहरुमा मिलरको यो चौथो अर्धशतक हो ।
मिलरलाई साथ दिएका थिए स्टब्सले । ७४ रनको साझेदारी गरेका स्टब्सले ३३ रन बनाए । हेनरिक क्लासेन ४, रिजा हेन्ड्रिक्स र मार्को यानसनले जम्मा ३–३ रन बनाए । एडेन माक्रम र क्विन्टन डि ककले खाता खोल्न सकेनन् ।
नेदरल्यान्ड्सका भिभियन किंग्मा र लोगन भान विकले समान २–२ विकेट लिए । बास डि लिडे १ विकेट लिए ।
यसअघि पहिले ब्याटिङ गरेको नेदरल्यान्ड्सले ९ विकेट गुमाउँदै २० ओभरमा १०३ रन बनाएको थियो । साइब्राण्ड एंगलब्रेक्सले ४० र लोगन भान बिकले २३ रन बनाए । अन्य ब्याटरले भने राम्रो प्रदर्शन गर्न सकेनन् ।
ओट्निल ब्राटम्यानले ४ ओभरमा ११ रन खर्चेर ४ विकेट लिए । एनरिच नोर्कियाले ४ ओभरमा १९ रन खर्चेर २ विकेट लिए । मार्को यानसनले ४ ओभरमा २० रन खर्चेर २ विकेट लिए ।
जितसँगै समूह ‘डी’ मा रहेको दक्षिण अफ्रिकाले लगातार दोस्रो जितका साथ शीर्ष स्थानमा रहँदै सुपर–८ को सम्भावना बलियो बनाएको छ ।
