— भारतीय फुटबल टिमका पूर्वकप्तान भाइचुङ भुटिया सिक्किम विधानसभा चुनावमा पराजित भएका छन् । सिक्किम विधानसभा चुनावमा सिक्किम डेमोक्रेटिङ फ्रन्ट(एसडीएफ)का उम्मेदवार भाइचुङ बार्फुङ क्षेत्रबाट पराजित भएका हुन् ।
भाइचुङलाई सिक्किम क्रान्तिकारी मोर्चाका रिक्साल दोर्जी भुटियाले पराजित गरेका हुन् । रिक्सालले ८ हजार ३ सय ५८ मत प्राप्त गर्दा भाइचुङले ४ हजार १२ मत ल्याए ।
सत्तारुढ सिक्किम क्रान्तिकारी मोर्चाले राज्यमा 'क्लिन स्विप' गरेको छ । विधानसभामा ३२ सिटमध्ये ३१ मा मोर्चा विजयी भएको छ ।
सन् २०१८ मा आफैं हाम्रो सिक्किम पार्टी खोलेका भाइचुङ गत नोभेम्बरमा मात्र पूर्वमुख्यमन्त्री पवन चाम्लिङ नेतृत्वको एसडीएफमा प्रवेश गरेका थिए । उनी एसडीएफका उपाध्यक्षसमेत हुन् ।
भाइचुङ भुटिया संसदीय चुनावमा पराजित भएको यो छैँटौँ पटक हो । उनी २०१४ मा तृणमूल कंग्रेसबाट दार्जीलिङ क्षेत्रबाट लोकसभा चुनाव लडेका थिए । त्यस्तै तृणमूलबाट २०१६ मा सिलिगुडीबाट पश्चिम बंगाल विधानसभा चुनाव पनि लडे तर उनी पराजित भए । त्यसपछि उनी सन् २०१९ मा सिक्किम विधानसभा चुनावमा ग्यांगटोक र तुमेन-लिंगी क्षेत्रबाट उम्मेदवार बनेका थिए । त्यस्तै उनी २०१९ को विधानसभा उपचुनाव मा पनि ग्यांगटोकबाट पराजित भए ।
भाइचुङ फुटबलमा जति सफल मानिए, राजनीतिमा त्यो सफलता पाएका छैनन् । भाइचुङले भारतीय राष्ट्रिय टोलीमा झन्डै १६ वर्ष एकछत्र राज गरेका थिए । सन् २०११ मा अन्तर्राष्ट्रिय फुटबल करिअरबाट सन्न्यास लिएर बसेका उनी फुटबल एकेडेमी चलाएर बसेका थिए । भाइचुङले दिल्लीस्थित जवाहरलाल नेहरु रंगशालामा बायर्न म्युनिखसँगको खेलबाट सन्न्यास लिएका हुन् । उनले भारतका लागि १०० भन्दा बढी खेल खेलेका छन् । अन्तर्राष्ट्रिय प्रतियोगितामा उनले भारतका लागि ४३ गोल गरेका छन् । उनकै नेतृत्वमा भारतीय फुटबल टिमले ३ पल्ट साफ च्याम्पियनसिपसमेत जितेको छ ।
तृणमूल प्रमुख ममता बनर्जीसँगको पारिवारिक सम्बन्धले उनलाई राजनीतिमा ल्याएको बताइन्छ । भाइचुङ राजनीतिमा आउनुअघि डान्स रियालिटी शो ‘झलक दिखलाजा’ मा पनि सहभागी बने । उनी तेस्रो संस्करणको विजेता पनि बनेका थिए ।
सन् १९७६ डिसेम्बरमा सिक्किममा जन्मिएका भाइचुङको फुटबल मोह सानैदेखिको हो । १६ वर्षको उमेरमा यिनले बंगालको चर्चित क्लब इस्ट बंगालवाट खेल्ने थालिसकेका थिए । इस्ट बंगालपछि अर्को चर्चित क्लब मोहन बगानबाट पनि उनले खेले । लगत्तै राष्ट्रिय टिममा अवसर पाए । युरोपेली क्लबहरूबाट खेल्ने पहिलो भारतीय फुटबल खेलाडी पनि हुन् भाइचुङ । १९९९ मा इङ्लिस क्लब बरीले उनीसँग ३ वर्षको सम्झौता गरेको थियो । फुटबलका यी हस्तीले सन् १९९८ मा अर्जुन पुरस्कार, २००८ मा प्रतिष्ठत पद्मश्री, २०१४ मा बंगला भूषणलगायतका सम्मान पाएका छन् ।
