: नेपाली कांग्रेसका महामन्त्री विश्वप्रकाश शर्माले पार्टी श्रमजीवी नागरिकको मुद्दाको पक्षमा उभिएको बताएका छन्। कांग्रेसले आइतबार गरेको सडक प्रदर्शनको भेलालाई सम्बोधन गर्दै उनले सहकारी पीडितको पक्षमा आइपुगेको बताएका हुन्। उनले सहकारीमा जम्मा गरेको रकम जोगाउने पक्षमा रहेको स्पष्ट पारे।
उनले सरकार अनुदार शैलीमा भएकाले सच्चिनुपर्ने धारणा राखे। उनले सभामुख रिमोट कन्टोलबाट चलेकाले संसदको गरिमा कायम गर्नुपर्ने र रिमोट कन्टोलबाट मुक्त हुनुपर्ने धारणा राखे।
लोकतान्त्रिक सवाल र संस्कृतिमाथि कसैलाई प्रश्न नउठाउन चेतावनी दिँदै उनले बल प्रयोगबाट राज्यसत्ता कब्जा गर्छौं भन्नेहरु संसदीय प्रक्रियामा सामेल भइरहेको बताए।
शर्माले सहकारी ठगीमा मुछिएका गृहमन्त्री रवि लामिछानेमाथि निष्पक्ष, इमान्दार र गहिरो संसदीय छानबिन हुनुपर्ने स्पष्ट पारे। उनले भने,‘भन्नलाई अन्तर्राष्ट्रिय छानबिन बनाए हुन्छ भन्ने तर नाम राख्न नचाहने।’
महामन्त्री शर्माले छानबिनबाट गृहमन्त्री निर्दोष देखिए माला लिएर कांग्रेस आफैं आउने उद्घोष गरे। महान्यायाधिवक्ताको कार्यालय रास्वपाको भातृ संस्था हो भन्दै प्रश्न गर्दै उनले भने,‘कहिले लेखेर दिन्छ सहकारी ठगीमा रवि लामिछाने दोषी हुनुहुन्न भनेर। कहिले लेखेर दिन्छ दुईवटा पासपोर्ट भएपनि छानबिन गर्नुपर्दैन भनेर।’
उनले मिसन ८४ भन्ने पक्षमा कांग्रेस नरहेको धारणा राखे।
