मुख्य समाचार
अप्रत्यासित नतिजाको दाउमा नेपाल
अप्रत्यासित नतिजाको दाउमा नेपाल

: आईसीसी टीट्वेन्टी विश्वकप सुरु हुन अब एक साता मात्रै बाँकी छ। आगामी जुन २ देखि अमेरिका र वेस्ट इन्डिजमा हुने विश्वकपका लागि सहभागी सबै २० वटै टोली तयारीमा जुटेका छन्। सहभागीलाई २० टोलीलाई चार समूहमा विभाजन गरिएको छ। दोस्रो पटक विश्वकप खेल्न लागेको नेपाल समूह ‘डी’मा छ। यो समूहमा पूर्वविजेता श्रीलंका, दक्षिण अफ्रिका, बंगलादेश, नेदरल्यान्ड्स र नेपाल छन्। नेपालले दोस्रो पटक टीट्वेन्टी विश्वकप खेल्न लागेको हो। यसअघि सन् २०१४ मा बंगलादेशमा आयोजना भएको विश्वकपमा नेपालले पहिलो पटक सहभागिता जनाएको थियो। त्यतिबेला घरेलु टोली बंगलादेशसँग पराजित भएको नेपालले अफगानिस्तान र हङकङलाई हराएको थियो। तर, नेट रनरेटमा पछि परेपछि शीर्ष आठमा पुग्न भने असफल भएको थियो। त्यसैले नेपाल यसपटक पनि आफ्नो दोस्रो सहभागितालाई उपलब्धिमूलक बनाउने योजनामा छ।


एसोसिएट राष्ट्रमा उत्कृष्ट प्रदर्शन गरिरहेको नेपाल रोहितकुमार पौडेलको कप्तानीमा छ। टोलीमा ६ बलमा ६ छक्का प्रहार गर्ने कीर्तिमान बनाएका दीपेन्द्रसिंह ऐरी, सोमपाल कामी, आसिफ शेख, कुशल भुर्तेल, कुशल मल्ल, करण केसी, गुलशन झालगायतका उत्कृष्ट युवा खेलाडीको समिश्रण छ। यसभन्दा पनि महत्वपूर्ण व्यक्ति छन्, मुख्य प्रशिक्षक मोन्टी देसाइ। उनको प्रशिक्षणमा नेपालले उत्कृष्ट प्रदर्शन गर्दै आएकाले टीट्वेन्टी विश्वकपमा पनि उलटफेर नतिजा ल्याउने विश्वास धेरैको छ। नेपालले टीट्वेन्टी विश्वकपमा अहिलेसम्म तीन खेल खेलेको छ। सन् २०१४ को विश्वकपमा नेपालले तीन खेल खेल्दा दुई जित र एक हारको नतिजा निकालेको थियो।

नेपालको समूहमा रहेका अन्य चार राष्ट्रमा सबैभन्दा बलियो टोली श्रीलंका र दक्षिण अफ्रिका हो। श्रीलंका पूर्वविजेता भए पनि पछिल्लो समय टोलीको प्रदर्शन खस्किएको छ। त्यसैले टीट्वेन्टी विश्वकपमा श्रीलंकाको मुख्य उद्देश्य भनेकै पछिल्लो समय खस्किएको मनोबल र प्रदर्शन उच्च बनाउनु हो। श्रीलंकाका कप्तान अलराउन्डर वानिन्दु हसरंगाले पनि टोलीको पुरानो लयलाई फर्काउनु आफ्नो मुख्य उद्देश्य रहेको बताउँदै आएका छन्। श्रीलंकन टोलीमा हसरंगासहित चारिथ असलंका, कुशल मेन्डिस, पाथुम निसंका, कामिन्दु मेन्डिस, सदिरा समराविक्रमा, एन्जेलो म्याथुज, धनन्जय डी सिल्भा, माथिसा पाथिरानालगायत खेलाडी छन्। श्रीलंकाले सन् २०१४ बंगलादेशमा आयोजना भएको विश्वकप जितेको थियो। यस समूहमा बलियो मानिएको दक्षिण अफ्रिकाले सन् २००९ र २०१४ मा सेमिफाइनलसम्मको यात्रा तय गरेको छ। ठूला प्रतियोगितामा ‘अभागी टोली’को छवि बनाएको दक्षिण अफ्रिकामा एडेन मारक्रमसहित जेरार्ड कोइज, क्विन्टन डी कक, रिजा हेन्डरक, मार्काे जेन्सन, हेनरिक क्लासेन, डेविड मिलर, कागिसो रबाडालगायत चर्चित खेलाडी छन्। एडेन मारक्रमको कप्तानीमा दक्षिण अफ्रिका यसपटक ‘अभागी टोली’ नभइ भाग्यमानी टोली बन्ने अभियानमा छ।




समूह ‘डी’को अर्को टेस्ट राष्ट्र हो, बंगलादेश। टीट्वेन्टी विश्वकपमा बंगलादेशको प्रदर्शन एक रुपको छैन। कुनै बेला ‘डार्क हर्स’ मानिने बंगलादेश टीट्वेन्टी विश्वकपमा शीर्ष आठबाट अघि बढ्न सकेको छैन। त्यसैले यस पटक विगतको भन्दा सुधारिएको प्रदर्शन गर्ने अभियानमा बंगलादेश छ। बंगलादेशी टिममा निजामुल हुसेन सान्तोसहित लिटोन दास, सौम्य सरकार, सकिब अल हसन, रिसाद हुसेन, मुस्तफिजुर रहमान, तान्जिद हसन तमिमलगायतका खेलाडी छन्।

यस समूहमा रहेको अर्को टोली हो, नेदरल्यान्ड्स। नेदरल्यान्ड्सको पनि टीट्वेन्टी विश्वकपमा दोस्रो सहभागिता हो। यसअघि सन् २०२२ को टीट्वेन्टी विश्वकपमा नेदरल्यान्ड्सले प्रतिस्पर्धा गरेको थियो। नेदरल्यान्ड्सलाई यस पटक चोटले पिरोलेको छ। आफ्ना महत्वपूर्ण खेलाडी घाइते भएका छन्। नेदरल्यान्ड्सका कप्तान स्कट एडवार्डले यस पटक अझ सुधारिएको प्रदर्शन गर्ने योजना बुनेका छन्। नेदरल्यान्ड्स टोलीमा म्याक्स ओडाउड, मिचेल लेभिट, आयान दत्त, बास डी लिड, विक्रम सिंहलगायत छन्। यस समूहको पहिलो खेल जुन ३ मा हुनेछ। पहिलो खेलमा टेस्ट राष्ट्र श्रीलंका र दक्षिण अफ्रिकाबीच प्रतिस्पर्धा हुनेछ। यस्तै जुन ४ मा नेपाल र नेदरल्यान्ड्स, जुन ८ मा श्रीलंका र बंगलादेश तथा नेदरल्यान्ड्स र दक्षिण अफ्रिकाबीच खेल हुनेछ। यस्तै जुन १० मा दक्षिण अफ्रिका र बंगलादेश, जुन १२ मा नेपाल र श्रीलंका, जनु १३ मा नेदरल्यान्ड्स र बंगलादेश, जुन १५ मा नेपाल र दक्षिण अफ्रिकाबीच खेल हुनेछ। यस्तै जुन १७ मा नेपाल र बंगलादेश तथा नेदरल्यान्ड्स र श्रीलंकाबीच प्रतिस्पर्धा हुनेछ।

नेपाली टोली

रोहितकुमार पौडेल, कमलसिंह ऐरी, सागर ढकाल, आसिफ शेख, अनिल साह, कुशल भुर्तेल, कुशल मल्ल, दीपेन्द्रसिंह ऐरी, ललितनारायण राजवंशी, करण केसी, गुलसन झा, सोमपाल कामी, प्रतिश जिसी, सन्दीप जोरा र अविनाश बोहरा

प्रतिक्रिया दिनुहोस्
अन्य समाचारहरु
: आइसिसी टि–ट्वाइन्टी विश्वकप क्रिकेटमा न्यूजिल्याण्डले युगान्डालाई पराजित गर्दै प्रतियोगितामा पहिलो जित दर्ता गराएको छ । वेस्टइन्डिजको ब्रायन लारा क्रिकेट एकेडेमी मैदानमा भएको खेलमा न्यूजिल्यान्डले युगान्डलाई ९ विकेटले पराजित गर्दै विश्वकपमा पहिलो जित दर्ता गराएको हो । जितसँगै समूह ‘सी’मा रहेको न्यूजिल्यान्डले तीन खेलमा २ अङ्क जोडेको छ । चार खेल खेलेको युगान्डाको २ अङ्क ...
: अमेरिका र वेस्ट इन्डिजमा जारी आईसीसी टीट्वेन्टी विश्वकप क्रिकेटमा नेपाल बलियो टोली दक्षिण अफ्रिकासँग एक रनले पराजित भएको छ। समूह चरणको तेस्रो खेलमा पराजय बेहोरेसँगै नेपालको सुपर आठको यात्रा पनि सकिएको छ। नेपालले समूहको अन्तिम खेल बंगलादेशसँग खेल्दै स्वदेश फर्किने छ। शनिबार बिहान वेस्ट इन्डिजको सेन्ट भिसेन्टस्थित किङ्सटनको अरनोस भाल रंगशालामा नेपालले झिनो अन्तरले ...
। टी–२० विश्वकपमा दक्षिण अफ्रिकाविरुद्ध रोमाञ्चक खेलमा नेपाल १ रनले पराजित भएको छ । यो हारसँगै नेपाल सुपर ८ मा पुग्ने सम्भावना अन्त्य भएको छ, जसले २०२६ मा सोझै टी–२० विश्वकप खेल्ने सम्भावना खुल्थ्यो । नेपालले पूरा खेलभर पकड राखेको थियो, तर अन्तिम दुई ओभरको प्रदर्शनका कारण हार्न पुग्यो । किङ्ग्सटाउनमा नेपालका कप्तान रोहित पौडेलले टस जिते ...
। आईसीसी टी-२० विश्वकप २०२४ मा समूह चरणबाट बाहिरिदा नेपालले २०२६ को टी-२० विश्वकप सोझै खेल्ने अवसर पनि गुमाएको छ । अमेरिका र वेष्टइण्डिजमा जारी विश्वकपमा सुपर-८ मा पुग्ने टोलीलाई २०२६ को टी-२० विश्वकप सोझै खेल्ने अवसर थियो । समूह डी मा रहेको नेपाल शनिबार दक्षिण अफ्रिकासँग १ रनले पराजित भएपछि सुपर-८ को सम्भावना समाप्त भएको ...
। युवा तथा खेलकुदमन्त्री विराजभक्त श्रेष्ठले सरकार पुरातन शैलीमा चलेको आरोप लगाउँदै सरकारलाई दिएको समर्थनबारे समीक्षा गर्ने बेला आएको बताएका छन् । शनिबार काठमाडौंमा राष्ट्रिय स्वतन्त्र पार्टीको स्थापनाको अवसरमा आयोजित शुभकामना आदानप्रदान कार्यक्रममा उनले यस्तो अभिव्यक्ति दिएका हुन् । सरकार पुरातन शैली र कर्मकाण्डी हिसाबमै चलेकोले आफूहरु खल्तीमा राजीनामा पत्र बोकेर हिँडेको उनले बताए । ‘ हामी ...