। नोबेल पुरस्कार विजेता समेत रहेका अमेरिकी गायक तथा संगीतकार बब डिलनबारेको बायोपिक फिल्मको छायांकन सुरु भएको छ । फस्टलुक तस्वीर सार्वजनिक गर्दै निर्माताले बुधबार यसबारे जानकारी दिएका हुन् ।
डिलनको भूमिकामा पछिल्लो पुस्ताका चर्चित हलिउड अभिनेता तिमोथी चालमेटले अभिनय गर्दैछन् । चालमेटलाई तस्वीरमा आर्मी–ग्रीन ज्याकेट र न्यूजब्वाय क्यापमा देख्न सकिन्छ ।
डिलनको सांगीतिक जीवनको वर्णन गर्ने यो फिल्मको छायांकन यसैसातादेखि न्युयोर्कमा सुरु भएको सीएनएनले जनाएको छ । यो खबर सार्वजनिक भएपछि फ्यानमाझ यसले उत्साह र मजाक दुवैथरी प्रतिक्रिया सिर्जना गरेको छ ।
एकजना एक्स प्रयोगकर्ता लेख्छन्, ‘उनी क्याम्प रकतिर जाँदैछन् जस्तो देखिन्छ ।’ ‘यो बब डिलन होइन, यो त्यो हरेक मानिस हो जसले मसँग बब डिलनको बारेमा कुरा गर्ने प्रयास गरेको छ,’ लेखिका मारिसा आर मोस लेख्छिन् ।
केहीले अभिनेता चालमेट ‘अमेरिकन टेल’ फिल्मको एनिमेटेड मुसा पात्र फिवेलजस्तो देखिने भन्दै कटाक्ष गरेका छन् । कोभिड संकट र लेखक–कलाकारको हड्तालका कारण यो फिल्मको निर्माण प्रभावित भएको थियो । फिल्म बनाउन डिलनले निर्देशक जेम्स म्यानगोल्डलाई सबै नोट र स्क्रिप्ट बुझाएका थिए ।
‘यो फिल्म वास्तवमा डिलनको बायोपिक होइन बरु गायकको जीवनको एक पलमा बढी केन्द्रित हुनेछ,’ निर्देशक म्यानगोल्डले भने, ‘यो फिल्म न्युयोर्कको ६० को दशकको सुरुवातमा १७ वर्षीय किशोरले खल्तीमा १६ डलर बोकेर अस्पतालमा रहेका वुडी गुथ्रीलाई भेट्न हिंडेको कथा हो ।’
अभिनेता चालमेटले यो फिल्ममा आफैं गीत गाउनेछन् र ‘एल्भिस’ फिल्ममा काम गरिसकेका केही संगीत कोचलाई अनुबन्धित गरेका छन् । यो फिल्मको आधिकारिक शीर्षक अहिलेसम्म सार्वजनिक भइसकेको छैन ।
