— लिभरपुलले १४ मिनेटको अन्तरमा चार गोल गरेपछि बिहीबार स्पार्टाक प्रागलाई ६–१ ले पराजित गर्दै सजिलै युरोपा लिगको अन्तिम ८ मा प्रवेश गरेको छ । त्यसमा कोडी गाक्पाले दुई गोल गरे । बुंडेसलिगाको शीर्षमा रहेको लेभरकुजनले पनि स्टपेज टाइमको दुई गोलको मदतले कराबागलाई पराजित गर्यो ।
पहिलो लेगमा लिभरपुललाई ५–१ को अग्रता प्राप्त थियो । यस्तोमा उसले समग्रमा ११–२ को ठूलो अन्तरको जित निकाल्यो । लेभरकुजन भने दोस्रो लेगमा ३–२ ले विजयी रह्यो र समग्रमा ५–४ ले अगाडि रहन सफल रह्यो । इटालीका दुई क्लब एटलान्टा र रोमा पनि क्वाटरफाइनल पुग्न सफल रहे ।
एटलान्टाले स्पोर्टिङ सीपीलाई २–१ ले हरायो र समग्रमा ३–२ को अग्रता लियो । ब्राइटनले एएस रोमालाई १–० ले हराए पनि यो जित पर्याप्त रहेन् र इंग्लिस प्रिमियर लिग क्लब ४–१ ले पछाडि पर्यो । युरोपा कन्फ्रेन्स लिगमा भने बिहीबारका खेलपछि एस्टन भिल्ला, क्लब ब्रुग, लिल र ओलम्पियाकोज क्वाटरफाइनल पुगेका छन् ।
दोस्रो लेगको खेलमा भिल्लाले आयाक्सलाई ४–०, क्लब ब्रुगले मोल्डेलाई ३–० र ओलम्पियाकोजले मकाबी टेल अभिभलाई ६–१ ले हरायो । लिल र स्ट्रम ग्राजबीचको खेल १–१ को बराबरीमा छुट्यो । समग्रमा भिल्लाले ४–०, ब्रुगले ४–२, लिलले ४–१ र ओलम्पियाकोजले ७–५ को अग्रता लिएको हो ।
