— सभामुख देवराज घिमिरेले संघीय संसद् भवनमा लघुवित्त ऋणीहरूको समूह हुलहुज्जतसहित प्रवेश गरेको र नाराबाजी गरेको विषयलाई लिएर नेपाल प्रहरीका महानिरीक्षक बसन्तबहादुर कुँवरसँग जानकारी लिएका छन् । लघुवित्त ऋणीहरू संघीय संसद्का दुवै सदनको बैठक सकिनेबित्तिकै संसद् भवनमा प्रवेश गरेर विरोध प्रदर्शन गरेका थिए ।
सभामुख घिमिरेको सचिवालयले दिएको जानकारीअनुसार उक्त घटनालाई गम्भीर रूपमा लिइएको छ । 'संसद् परिसरमा लघुवित्त ऋणीहरू प्रवेश गरेको विषयमा सभामुखले गम्भीर चासो लिनुभएको छ । सभामुखले आजै प्रहरी महानिरीक्षक बसन्तबहादुर कुँवरबाट घटनाबारे जानकारी लिनुभएको छ,' सभामुखका प्रेस विज्ञ शेखर अधिकारीले भने, 'उहाँले सुरक्षा व्यवस्थापनबारे आफू गम्भीर र चिन्तित भएको बताउनुभयो ।'
महानिरीक्षक कुँवरले उक्त घटनाको छानबिन गर्नका लागि तीन सदस्यीय समिति गठन गरिएको सभामुखलाई जानकारी दिएका थिए । समितिमा एसएसपी दिनेशराज मैनाली संयोजक रहेको र एसपी नवराज अधिकारी र डीएसपी दिनेश घिमिरे रहेको जानकारी सभामुखलाई महानिरीक्षक कुँवरले दिएका थिए ।
