— सन् २०२१ यता पहिलोपटक बिहीबारको सेयर बजार कारोबारका क्रममा एप्पललाई पछि पार्दै माइक्रोसफ्ट विश्वको सबैभन्दा मूल्यवान कम्पनी बन्न सफल भयो । २०२४ सुरु भएदेखि नै एप्पलको सेयर निरन्तर खस्किने क्रम जारी छ भने माइक्रोसफ्टले आफ्नो अवस्था निरन्तर सुधार गर्दै लगेको छ ।
बिहीबार केही समयका लागि माइक्रोसफ्ट पहिलो स्थानमा रहे पनि एप्पलले केही घण्टामै आफ्नो पहिलो स्थान फिर्ता लिएको थियो, त्यसपछि दिनभर नै दुई कम्पनीको एकअर्कालाई उछिन्ने क्रम चलिरह्यो । बिहीबार बजार बन्द हुँदा भने एप्पल २८ खर्ब ८९ अर्ब अमेरिकी डलर मूल्यका साथ पहिलो स्थानमा कायम छ भने माइक्रोसफ्ट २८ खर्ब ८६ अर्ब मूल्यका साथ दोस्रो स्थानमा रहेर एप्पललाई पछ्याइरहेको छ ।
विश्वको मूल्यवान कम्पनीको सूचिको तेश्रो स्थानमा ६ खर्ब २० अर्ब अमेरिकी डलरका साथ साउदी अराम्को, चौथो स्थानमा १७ खर्ब ८८ अर्ब अमेरिकी डलरको अल्फाबेट (गूगल) र पाँचौँ स्थानमा १६ खर्ब ३ अर्ब अमेरिकी डलरका साथ अमेजन रहेका छन् भने छैंटौंदेखि दसौं नम्बरसम्म क्रमश: एनभिडिया, मेटा, बर्कसायर, टेस्ला र लिली छन् । सूचीमा संलग्न भारतीय अर्बपति मुकेश अम्बानीको रिलायन्स इन्डस्ट्रिज २ खर्ब २१ अर्ब अमेरिकी डलर मूल्यका साथ ४५औं नम्बरमा रहेको छ ।
डिसेम्बर १६, २०२३ मा ३० खर्ब १ अर्ब आसपास रहेको एप्पलको मूल्य त्यसयता ओरालो लाग्न शुरू भएको थियो, एप्पलले आफ्नो वर्ष २०२३ भर ४८ प्रतिशत बृद्दि गर्न पनि सफल भएको थियो । आफ्नो पछिल्लो सफल जेनेरेटिभ एआई उत्पादन च्याटजीपीटी सार्वजनिक गर्नुपूर्व लगभग साढे १६ खर्ब अमेरिकी डलर मूल्य रहेको माइक्रोसफ्टले त्यसयता आफ्ना उत्पादनमा निरन्तर सुधार र शेयरमा लगातार बृद्दि गर्दै आएको छ ।
वर्ष २०२३ भरमा मात्रै माइक्रोसफ्टको मूल्य झन्डै ५७ प्रतिशतले बढेको छ भने अक्टोबर २१, २०२३ यता कम्पनीको सेयर मूल्य निरन्तर उकालो लाग्ने क्रममा छ । आफ्ना धेरै उत्पादनमा एआई समावेश गर्ने र नयाँ प्रयोगमा सफल रहेको माइक्रोसफ्टका बारे वालस्ट्रिट अत्यन्तै सकारात्मक रहेको र चीन/रूसको बजारसमेत आफ्ना आपूर्ती संयन्त्र र उत्पादनमा नयाँपन नभएको आरोप झेल्ने गरेको एप्पलप्रतिको आकर्षण माइक्रोसफ्टको तुलनामा केही कमजोर रहेको रोयटर्सको मूल्यांकन छ ।
बिहीबार एक दिनमा मात्रै एप्पलको शेयर मूल्यमा ०.३२ प्रतिशतले कमी आएको थियो भने माइक्रोसफ्टको शेयर मूल्य ०.४९ प्रतिशतले बढेको थियो । बिहीवार वालस्ट्रिट बन्द हुनेबेला एप्पलको सेयर मूल्य १८५.५९ अमेरिकी डलर र माइक्रोसफ्टको सेयर मूल्य ३८४.६३ अमेरिकी डलर थियो ।
