— औषधि व्यवस्था विभाग वीरगन्ज कार्यालयले सोमबार ठूलो परिमाणमा भारतीय औषधि जफत गरेको छ । सूचनाका आधारमा कार्यालयका निमित्त प्रमुख मुकेन्द्र पञ्जियारको नेतृत्वमा खटिएको कार्यालयको टोली वीरगन्ज–१६, नगवास्थित गोदाममा भण्डारण गरी राखेको अवस्थामा श्री वैद्यनाथ आर्युवेद भवन पटना भारतद्वारा निर्मित औषधि बरामद गरेको हो ।
कार्यालय प्रमुख पंजियारका अनुसार, सिरहा घर भएका हिमालयन सप्लायरका व्यवस्थापक महम्मद अतिम अनवरले ती औषधि अवैध रूपमा भण्डारण गरी राखेको अवस्थामा बरामद गरिएको हो । अनवरलाई पनि पक्राउ गरी आवश्यक कारबाही थालिएको छ ।
औषधि व्यवस्था बिभागबाट परीक्षण गर्दा ‘गुड म्यानुफ्याक्चरिङ प्राक्टिस’ मा अनुत्तीर्ण भएको उक्त भारतीय कम्पनीको औषधि आयात र बिक्री वितरणसमेत अवैध मानिएको छ ।
तर अनवरले उक्त औषधि जानाजान आयात गरेर बिक्री वितरण गरेको पाइएकाले कार्यालयले कारबाही प्रक्रिया अघि बढाएको पंजियारले बताए । बरामद भएको औषधिमा वैद्यनाथ कम्पनीका ७ वटा ब्रान्डका गरी ८ हजार बोतल औषधि रहेका छन् ।
