— रुस–युक्रेन युद्धमा स्याङ्जाका २३ वर्षीय हरिप्रसाद अर्यालको निधन भएको खबर उनका वृद्ध बुबाआमाले बुधबार मात्रै पाए । परराष्ट्र मन्त्रालयको कन्सुलर विभागले उनको निधनबारे मंगलबार नै वालिङ नगरपालिका–१४ का वडाध्यक्ष बोधराज कुँवर (राजु)लाई आधिकारिक जानकारी गराएको थियो । अर्यालका आफन्तको आग्रहमा उनको परिवारलाई बुधबार खबर पुग्यो ।
अर्यालको निधनको खबरपछि टोल, छिमेक र आफन्त मान्खुस्थित घरमा जम्मा भएका छन् । आफन्त बद्री अर्यालका अनुसार कन्सुलर विभागले शव आउने/नआउने एकिन गर्न अझैं दुई दिन लाग्ने बताएको छ । ‘दुई दिन पर्खनुस् भन्ने खबर आयो,’ उनले भने, ‘शव नआउने भयो भने कुशको प्रतिमा बनाएर दाहसंस्कार गर्नेबारेमा छलफल भइरहेको छ ।’
१८ वर्षको उमेरमा नेपाली सेनामा भर्ती भएका उनले साढे दुई वर्षपछि राजीनामा दिए । ओमन प्रहरीमा जान आवेदन दिएका थिए । सेनाबाट राजीनामा दिएर आवेदन दिए पनि उनी सफल भएनन् । त्यसपछि दक्षिण अफ्रिका जाने प्रयासमा समेत असफल भएपछि उनी निराश थिए । सेनाबाट निस्किएपछि विदेश जाने प्रयास सफल नहुँदा उनले दबाब महसुस गरेको हुन सक्ने बद्रीले बताए ।
उनका अनुसार हरि नेपालबाट दुबई गएका थिए । दुबईबाटै कात्तिक ३ मा रुस पुगे । पुगेको ५ दिनमा रुसी सेनामा भर्ती भए ।
पछिल्लोपटक मंसिर १८ (डिसेम्बर ४) मा फेसबुकमा एक भिडियो पोस्ट गर्दै उनले ‘यस्तै छ जिन्दगी, बाँचे भेट, मरे त यत्तिकै’ लेखेका छन् । मंसिर १९ सम्म उनी परिवारको सम्पर्कमा थिए । भाउजुको म्यासेन्जरबाट बुबाआमासँग कुरा गर्थे ।
त्यसपछि भने सम्पर्कविहीन हुँदा उनको निधन भएको गाइँगुइँ चलेको थियो । ‘हामीले यतिबेला खतरा छ, नजाउ भन्दाभन्दै गयो,’ बद्रीले भने, ‘उ रिस्क नलिएसम्म प्रगति हुँदैन भन्थ्यो । रुसी सेनामा भर्ती भएपछि त्यस्तै लेखेर फोटो, भिडियो पनि पोस्ट गर्यो ।’
भिजिट भिसामा एजेन्टको माध्यमबाट दुबई हुँदै रुस गएर सिधैं भर्ती हुने र कमाइ समेत राम्रो हुने सुने पछि उनी त्यता जान लालायित भएको बद्रीले सुनाए ।
